• IMQ Igurco Alhóndiga egoitza berriak, Concha Jeneralaren 20 kalean zabaldu denak, 79 toki eskaintzen ditu –banako 59 gela eta 10 gela bikoitz–, adinekoen autonomia eta ongizatea sustatzen dituen eta pertsona ardatz duen arreta-eredu batean oinarrituta.
  
  
• Irekitze estrategiko horren eskutik, IMQ Igurcok euskal erreferente soziosanitario gisa duen posizioa finkatu du, 2024an, batez beste, 1.023 pertsona baino gehiago artatu baitzituen, eta, beraz, eragin positiboa sortzen baitu Euskadiko asistentzia-kalitate soziosanitarioan, bereziki hiri-ingurunean kalitatezko zaintza-konponbideak eskuratu nahi dituzten familientzat.
  
  

IMQ Igurcok egoitza berria zabaldu du Bilbo erdialdean bertan, IMQ Igurco Alhóndiga izenekoa; hala, zerbitzu-sareak zortzi egoitza eta 955 toki ditu egun Euskadin. Zentro berriak 19 milioi euroko inbertsioa ekarri du. Zentro berria Concha Jeneralaren kalearen 20. zenbakian kokatu da, eta 79 toki ditu: 59 banako gela eta 10 gela bikoitz, guztiak, guztiz egokituta.

“IMQ Igurco Alhóndiga zabaldu dugu hiri-inguruneetan, esaterako Bilbon, kalitatezko asistentzia-baliabideak gero eta gehiago behar direlako eta adinekoei ingurunearekin duten loturari eustea errazten dielako, alderdi hori funtsezkoa baita beren ongizaterako”, azpimarratu du, IMQ Igurcoko zuzendari Santiago Canalesek.

Eredu berritzailea zaintza osoa emateko

7.500 m²-tik gorako azalera du egoitzak, eta pertsona ardatz duen arreta-eredua eskaintzeko diseinatu da, egoitzako adineko bakoitzaren indibidualtasuna eta lehentasunak aintzat hartuta. Ikuspegi hori arreta-plan pertsonalizatuen bidez gauzatzen da, eta plan horiek, familiak prozesuan aintzat hartuta, diziplina anitzeko taldeek egiten dituzte. Adinekoen eskura hainbat zerbitzu jartzen da, hala nola balorazio geriatriko integrala, arreta medikoa eta erizaintza espezializatuko arreta, estimulazio fisiko eta kognitiboa eta adinduen interes eta balioetara egokitutako jarduera ludiko eta komunitarioak.

Egoitzako pertsona bakoitzak badu, gainera, bere Arreta eta Bizitza Plan Indibidualizatua, eta hori profesional hauek osaturiko diziplina anitzeko talde batek diseinatzen du: medikuak, erizainak, fisioterapeutak, psikologoak, gizarte-langileak eta jarduera soziokulturaletako teknikariak. Hala, egoitzakoek nahiz beren senideek zuzenean parte hartzen dute Plan pertsonalizatua egiteko prozesuan, haien gustu eta lehentasunetara egokitu dadin.

Egoitza IMQ Igurco Alhóndigak hiru bizikidetza-unitate ditu bereiz, espazio komun propioak dituztenak, baita autonomo direnentzako eremu espezifikoak ere. Zentroko instalazioen artean nabarmentzekoak dira gimnasio bat, ile-apaindegi bat eta podologiako areto bat, menu egokituak ematen dituen sukalde propio bat eta aire zabalean egoteko aukera ematen duen ataripea ere.

Badu bereizgarri bat, IMQ Taldeko kontsultategi mediko batekin integratzen dela, eraikin berean baitaude biak, eta kontsulategi horrek arreta espezializatua zuzenean eskuratzeko aukera ematen du. Eredu horrek osasun-zerbitzuen eta egoitza-zerbitzuen arteko koordinazioa errazten du, eta hori abantaila itzela da patologia konplexuak dituzten pertsonentzat.

“Asistentzia-zerbitzuak eta osasun-zerbitzuak espazio berean uztartu izana IMQ Igurco Alhóndigaren bereizgarria da, eta horrek gure zentroko adinekoen zaintza integralari eutsiko dio”, adierazi du IMQ Igurcoko asistentzia-zuzendari Janire Santamaríak.

Teknologia eta familiengandik gertu

Egoitzak baditu tresna digitalak gardentasuna bermatzeko eta familiekiko komunikazioa indartzeko, hala nola "Egoitza Gardenak" app-a, egoitzan daudenen eguneroko jardueraren jarraipena denbora errealean egiteko aukera ematen duena.

Berrikuntza teknologiko horrek erakusten du IMQ Igurcok arreta gozatuko eredu batekin duen konpromisoa, bitarteko digitalak ere euskarri izanda, egoitzako pertsonen eta beren pertsona maiteen arteko hurbiltasun fisiko eta emozionalaren alde egiten duena.

Eragina Bilbon eta lurraldean

IMQ Igurco Alhóndigak asistentzia-eskaintza hobetzeaz gain, bertoko enpleguari mesede egin dio, 70etik gora zuzeneko lanpostu sortu baititu.

Zentro hori zabaldu izanak IMQ Igurcok Bizkaian duen presentzia sendotu du; izan ere, lurraldean zazpi egoitza, 28 tutoretzapeko etxebizitza eta 11 eguneko zentro kudeatzen ditu egun. 2024an, IMQ Igurcok batez beste 1.023 pertsona artatu zituen Euskadin.

“Zentro berri bakoitza irekitzeak gizarte-premia bat betetzeaz gain, gure lurraldeko ekonomia-sarea eta enplegua indartzen ditu”, amaitu du azaltzen IMQ Igurcoko zuzendari nagusi Santiago Canalesek. Erakundearen fakturazioa, iaz, 34 milioi eurokoa izan zen, eta 600 pertsona baino gehiagori lana eman zien.