• Bizkaiko Foru Aldundiak etxean bizitzen jarraitzeko sortu duen etxeTIC laguntza-zerbitzuaren erabiltzaileak, horien zaintzaileak eta senideak Leioako San Juan Bataiatzailearen elizan elkartu ziren.
  
  
• Hala, elkartzeko eta identitate kulturaleko elementu bihurtu zen musika, erabiltzaileen, familien, zentroen eta komunitatearen arteko harremanak errazteko asmoz.
  
  

Leioako San Juan Bataiatzailearen elizak IMQ Igurcoren Abesbatza Lehiaketaren bigarren edizioa hartu zuen. Ekimen horrek etxeTIC ereduko –Bizkaiko Foru Aldundiak etxean bizitzen jarraitzeko sortu duen laguntza-zerbitzua– eguneko zentroetako eta Igurcoren egoitzetako erabiltzaile diren adinekoak bildu zituen, musikaren, bizikidetzaren eta parte-hartze sozialaren inguruan. Pilar Grados García Leioako Udaleko Gizarte Politiketako eta Osasun zinegotzia ere bertaratu zen ekitaldira.

EtxeTIC Leioa-Erandio izan zuen anfitrioi topaketak. Aurtengo edizioan, etxeTIC Mungiak eta Bilbozar (Bilbo), Orue eta José M.ª Azkuna (biak Zornotzakoak) egoitzek ere parte hartu zuten. Bestalde, etxeTIC Ondarroa, ezin izan zuenez aurrez aurre parte hartu, senideen, inguruko pertsonen eta eguneko zentroko lagunen laguntzarekin prestatutako bideo baten eskutik egon zen ekitaldian.

IMQ Igurcoren II. Abesbatza Lehiaketak gizarte ongizatea eta adinekoen parte-hartzea bultzatzea izan zuen helburu, ezagutzak, oroitzapenak eta bizi esperientziak partekatzeko aukera ematen duen jarduera haren bidez. Hala, elkartzeko eta identitate kulturaleko elementu bihurtu zen musika, erabiltzaileen, familien, zentroen eta komunitatearen arteko harremanak errazteko asmoz.

Abesbatza parte-hartzaileen abeslariak adinekoak eta, kasu batzuetan –esaterako, Bilbozar egoitza eta eguneko zentroa– erabiltzaileen eta egoitzetako adinekoen senideak ziren; horrela, ekimenaren belaunaldien arteko izaera eta izaera komunitarioa indartu egin ziren.

Ekitaldi horretara, halaber, Unbe egoitzako (Erandio) talde bat, Alhondiga egoitzako (Bilbo) beste bat, etxeTIC Leioako erabiltzaileak eta senideak bertaratu ziren ikusle gisa. Gainera, Gaztela eta Leongo Dultzaineroen Elkarteak eta Leioako Jubilatuen Zentroko Abesbatzak ere parte hartu zuten musika-erakunde gonbidatu gisa.

Emanaldiak amaitu eta abesbatzak txalotu ostean, parte-hartzaileak Leioako eguneko zentroan elkartu ziren, musika-talde gonbidatuek girotutako ekitaldi batean, adinekoen gaitasunei balioa emateko, haien parte-hartzea bultzatzeko eta harreman eta aintzatespen sozialerako espazioak sortzeko antolaturiko jardunaldiari amaiera bikaina emateko.

EtxeTIC Leioako abesbatzaz

EtxeTIC Leioako abesbatza iaz sortu zen, erabiltzaileek beraiek abesteko adierazi zuten interesak bultzatuta. Harrezkeroztik, talde egonkor gisa finkatu da, eta horretan eguneko zentroko pertsonek, senide zaintzaileek eta etxeTIC zerbitzuaren erabiltzaileek parte hartzen dute, eta horietako batzuk, ikusmen urria, mugikortasun urria edo erasan kognitiboa dituzte.

Gaur egun, 25 kidek osatzen dute abesbatza, eta horiek bai abestiak aukeratzen, bai abesteko hainbat alderditan parte hartu zuten lehiaketan. Horretan, hamaika abeslarik kantatu zuten aldarean, eta gainerako taldekideek, inguruko eserlekuetatik.